Felicitation Programme

Felicitation Programme at Loyola

On Tuesday, April 25, 2023

Meghalaya a·dokni PHE, Housing aro Soil & Water Conservation Minister baksana Williamnagar-ni MLA ong·enggipa Marcuise N Marak-na Mongolbar salo, Williamnagar-o nambatstanggipa college-rangoni damsa Loyola College-ni gita mande ra·pilskaaniko program-ko ong·atangaha.

Tom·ani a·bachengao, Loyola College-ni History Department, rimchaksoani kattarangko aganangaha aro Commerce Department-ni chatro chatrirang, rimchaksoani gitko ring·skaaha.

Ia tom·anio Loyola College-ni Principal Fr Sunny Augustine-ba rimchaksoani kattarangko aganangengon, Loyola College-na pangnan maming neng·nikani gri dakchakanirangko on·engani gimin a·dokni PHE Minister aro Williamnagar-ni MLA-ko mittelpilangaha.

Ia tom·aniko ong·atanio Williamnagar-ni MLA Marcuise Marak-ba, jinmana aganprakangskaengon, iandake an·tangna mande ra·pilskaaniko dakahani gimin Loyola College-ni Principal-ko, chatro chatrirangko, skigiparangko aro office-o kam ka·enggiparangkoba mittelpilangaha.

Mikkangchiba ua Loyola College-na aro Williamnagar constituency gimiknan nanga gita dakchakanirangko on·angkugen ine ku·rachakaniko on·angengon, a·dokni saksa minister ong·e ua Meghalaya a·dok gimiknan an·tangni bil ama gita kamrangko ka·angkugen ine Marak, ku·rachakaniko on·angaha.

Uni kamrangko ka·anio Nokgipa Isolni pattianina dingtangmancha una bi·chakchina gitaba ua Loyola College-ko mol·molangaha.

Ia program-ko ong·atanio Science department-ni chatro chatrirangba dingtangmancha chrok mesaanichi manderangko an·saoatangaha aro Loyola College-ni Choir-ba gitko ring·e tom·anio bak ra·giparangko an·saoatangaha.